تشرفنا بيك يابوحميد
بص بقى..انا مبعدتش عن الفوركس الفتره الطويله اللى انت بعدتها..انا بعدت عن الفوركس سنه..من 2012 تقريبا الى 2013.
الموضوع هو التزام فقط..لو اهتميت بالفوركس كأى بيزنس ان شاء الله هتنجح وهتعمل ربح.
شوف لو فتحت محل هتهتم بيه ازاى واهتم بالفوركس زيه بالظبط.
انا اتحديت نفسى..قولت ازاى ناس بتكسب فى الفوركس وانا عمال امرجن اكونتات؟
الناس دى مش احسن منى فى حاجه.
اتعلمت واشتريت برامج فوركس تيستر والحاجات دى وبقيت اقعد قدام الكمبيوتر بالأيام.
ولعلمك اقسم بالله المكسب فى الفوركس سهل جدا اسهل مما تتخيل.
بس المشكله ان الناس لما بتدخل المجال ده بتتوه.
سبب التوهان هو ملايين المنتديات وملايين المؤشرات والاستراتيجيات...بحر من المعلومات.
سر النجاح فى الفوركس فى جمله واحده هو انك تحدد انت عاوز ايه؟
عاوز ايه من الفوركس؟
لو اجابتك واضحه على السؤال والتزمت بالهدف اللى انت حدتته هو ده 50% من النجاح فى الفوركس.
الباقى يرجع للاستراتيجيه اللى لازم تكون ناجحه عشان تقدر توصل بيها لهدفك.
وبالنسبه لادارة راس المال هو شىء نسبى..على حسب هدفك من الفوركس.
يعنى ممكن ماتكونش ملتزم بادراة راس المال وبالرغم من كده بتكسب وبتقفل الشهر على ربح.
وخليك دايما فاكر ان 95% من الناس بتخسر فى الفوركس.
يبقى انت لازم تفكر بطريقه مختلفه عن كل الناس دى عشان تكسب.
الفوركس علم وتحليل وسهر وتعب عشان تنجح فيه..زى اى بيزنس فى الدنيا لازم تتعب فيه عشان تنجح.
كنت شوفت فيديو زمان لواحد من اللى نجحوا امريكى هو وبقى عنده شركات لادارة المحافظ.
قالك لو انت قريت كتاب عن مخ الانسان..هل تقدر بعد ما تخلص الكتاب تعمل عمليه لمخ انسان؟
الاجابه لا طبعا..لازم تكون متعلم وعندك خبره كبيره..مش اى حد قرا كتاب او حضر ويبنار بقى تريدر.
وبقولك كمان مره..حدد هدفك..اعرف انت عاوز ايه بالظبط والتزم بالهدف مهما أغراك السوق.
وافتكر دايما ان 95% من الناس بيخسروا..يبقى انت لازم تفكر بطريقه مختلفه عن كل الناس دى عشان تبقى من 5% اللى بيحققوا ربح.
مش عايز اطول عليك اكتر من كده ولو فى اى سؤال انا تحت أمرك.