اف اكس ارابيا..الموقع الرائد فى تعليم فوركس Forex - خاف على بلدك

اللي قاعدين في البيوت و بيأكلوا وبيشربوا و هما حاسين بالازمة من جانب واحد ، يا بشر - اتقوا الله في كلامكم على الإنترنت ، لا مش مع مبارك ولا معارض ولا انتمي إلى اي حزب - انا فقط شاب مصري عايز البلد ماتخربش - عايزكم تتخيلوا ، في ناس بتشتغل و بتقبض باليوم ! يعني ايه الكلام دا ؟ يعني الناس دي من 25 يناير إلى اليوم ، غالباً مش لاقيين شغل و دا شئ لمسته بنفسي بعد ما سألت ناس غلابة على قد حالهم جداً - فكر بعقلك ، الناس دي بعد شهر هيعملوا ايه ؟ هايجيبوا فلوس منين عشان يشتروا اكل اللي كل يوم اسعاروا في الطالع بسبب قلة المعروض منه و زيادة الطلب في نفس الوقت - تخيلوا ايه ممكن يحصل لهم ؟ لو مش خايف عليهم ، خاف على نفسك يا اخي لانهم في يوم هايضطروا يمدوا إيديهم بالسلم او بالسرقة " لا قدر الله " يعني عواقب الموضوع وخيمة إذا استمر الوضع بالشكل دا ، اتقي الله في كلامك على الإنترنت اللي زادت اهميته 1000% بعد ما حدث يوم 25 يناير ، لذلك لازم نحافظ على كلامنا و نبعد عن اي كلام ممكن يأثر على وضع البلد و احنا مش قصدين - الناس اللي بيقبضوا باليوم دول عندهم اولاد - الاولاد عايزين يأكلوا زي ما انت بتأكل في بيتك عشان عندك شوية فلوس في البنك ولا معاش ولا مرتب بيأخده ابوك كل شهر حتى لو كان بسيط - الناس دي مش معاه فلوس لليوم الواحد - هايعملوا ايه كمان شهر ؟ يا ناس إذا كانت ايام حسني ايام سودة ، يبقى الايام اللي جاية هاتبقى طييييييين - ممكن ناس من العمالة البسطاء دول يسرقوا ، اه يسرق ايه المشكلة طالما البلد بتولع و لا انا و لا انت بنفكر فيهم ، يعني ماهو إنسان برضو و عنده عيال عايزهم ياكلوا ؟ ليه مافكرتش في الفئة دي ؟ عايزين نحاول نهدي الموقف على الإنترنت عشان الغلابة اللي ماطلعوش في المظاهره لانهم كانوا في الوقت دا بيعرقوا و بيشتغلوا عشان يجيبوا العيش - انا و انت مش الشعب المصري كله ولا بنمثل اي شئ ولا حتى بتوع التحرير بيمثلوا الشعب المصري - في فئة كبيرة بتدعي عليكم دلوقت مش عشان الإحتجاج اللي المفروض إنه انتهى ، لا ، الناس دي بتدعي عشان حسوا الايام دي بتغيرات ملحوظة على اسعار السلع الغذائية الأساسية البسيطة اللي ممكن يشتروها و في المقابل مفيش فلوس في الاساس عشان يشتروا !!!!!!!!!!!!!!!!!!!!! هيعملوا ايه إذا استمر الوضع بالشكل دا ؟ لو مابتفكرش في الغلابة ، يبقى فكر في وضع مصر إقتصادياً ، مبقاش في سياح في مصر ، البورصة خسرت 70 مليار جنيه و اللي السبب الرئيسي فيها مظاهرة الغضب - الجنيه المصري بينزل قدام الدولار بشكل بشع - رحلات الطيران توقفت بشكل كبير - باقي موارد الإقتصاد المصري هتبدأ تتوقف قريباً - يعني مفيش موارد بشرية ولا موارد إقتصادية ، يعني من الآخر ، البلد بتخرب بشكل ملاحظ - طيب ، لو مابتفكرش في دا كله ، هل فكرت في منظر مصر عالمياً دلوقت ؟ هل فكرت في ان قوة مصر داخلياً ، بتنعكس بشكل كبير خارجياً و دا بيؤدي إلى قوة البلد ؟ يعني ايه ؟ يعني البلد داخلياً بتخرب و الجيش بدل ما يكون بيتدرب ولا في المواقع بتاعته ، موجود بين الناس ، اللهم الجيش اللي بيحمينا دلوقت هو اهم حاجة ممكن نعتمد عليها في الوقت الحالي ، لكن للاسف الشديد - الجيش يحمي من إتجاه - و العند ماسكنا من إتجاه تاني !!!!!!! عشان إيه دا كله ؟ فكر في بلد و اتقي الله ، و فكر بعقلك هتلاقي ان الموضوع كله كام شهر و هيرحل حسني للابد و نخلص منه . كلامي لكل مصري عاقل بشرط ، إنه يكون بيخاف على البلد دي ........

شادي عبده