طيب نرجع تاني للمثال ..
هنفترض انك معاك مثلا حساب بـ 1000 دولار وانت متوقع ان اليورو هيصعد .. يبقى انت خلاص فكرة انك تشتري ... صح ؟؟
طيب اول سؤال هيجي في بالك انت هتشتري كام ؟؟؟ هتشتري اي نوع من اللوتات ( العقود ) ؟؟ ستاندرد .. ميني ... ولا مايكرو ؟؟
طيب تعالوا نتفق اتفاق .. اولا احنا عرفنا حجم كل عقد من دول كام صح ..؟؟ طيب وايه المانع اننا نفتكر مع بعض ..
الاول : ستاندرد .. 100000 وحدة من العملة طيب لو حبينا نعرف العقد ده لو اشتريناه كل نقطة زيادة هتمثل كام مكسب لينا يعني من الاخر مكسب النقطة كام ؟؟ طيب بسيطة احنا نضرب 100000 × 0.0001 = 10 دولار يعني كل نقطة السعر هيطلعها احنا هنكسب 10 دولار وكل نقطة السعر هينزلها احنا هنخسر 10 دولار والعكس في حالة البيع ..
طيب لو حبينا نعرف قيمة النقطة بالنسبة للعقد الميني ( 10000 وحدة من العملة )برضه هنضرب 10000 × 0.0001 = 1 دولار وهكذا .. بالنسبة للمايكرو ( 1000 وحدة من العملة ) هنضرب 1000 × 0.0001 = 0.10 دولار ( 10 سنت ) .. تمام كده طيب نرجع تاني للمثال بتاعنا ..
انت هتشتري كام ؟؟؟
اكيد طبعا انا سامعكم كله بيقول انا هشتري ستاندرد النقطة بـ 10 دولار يعني الواحد ياخدله 10 نقاط ( وعلى فكرة ده ممكن يحصل في دقايق ) يبقى الواحد كسب 100 دولار يعني 600 جنيه مصري في دقايق ... ده الموظف مش بياخدهم في الشهر ... والله يا حبيبي الغالي لو بالسهولة دي الواحد كان زمانه عمل المليون الرابعة بس المشكلة ان انت ممكن تتوقع ان السعر يطلع 10 نقاط وده عادي ممكن يحصل وتكسب 100 دولار بس ممكن السعر ينزل 10 نقاط يعني هتخسر 100 دولار يعني لو حسبناها 100 دولار بالنسبة لرأس مالك ( 1000 دولار ) يبقى انت خسرت 10% ينهار يعني كلها 9 صفقات تاني زي كده وتقرا الفاتحة على الحساب بتاعك يعني في دقايق ممكن تخسر 1000 دولار ... طيب وده ليه ؟؟ انا هقولك ليه ..
لانك عملت زي عم محمد :: اولا كنت طماع .. مفكرتش كويس.. مكنتش صبور ..
طيب وانت تنصحني بأيه يا مصطفى ..؟؟ انا هنصحك نصيحة واحدة بس لو انت مقتنعتش انك لازم تكون زي عم سمير .. يبقى كلامي ملهوش اي لازمة ..
لازم تفكر كويس .. لازم تعرف ازاي تتصاحب على السوق ومتكونش ليه عدو لانك لو عملت فيها بطل ووقفت في وش السوق لازم السوق هياكلك .. علشان انت معرفتش تضحك على السوق معرفتش تاخد اللي عاوزه منه من غير ما يزعل ..
طيب برضه يا مصطفى مرفتعش انا هعمل ايه ؟؟ انا هقولك انت هتقعد بينك وبين نفسك وتشوف ايه قيمة النقطة المناسبة اللي لو ربنا قدر وخسرت هتكون خسارة مقبولة .. ولو كسبت برضه يكون مكسب كويس .. طيب ايه رأيك انا ممكن اساعدك بطريقة ممكن تمشي بيها في الاول لغاية لما تعرف نظام نفسك ...
انت ممكن تحدد وقف الخسارة الاول .. طبعا مش هتعرف تحدده غير لما تتعلم ازاي تحلل وتتوقع حركة السعر وبعد كده تقول لنفسك انت مستعد تخسر كام % من حسابك ؟؟؟ في الصفقة دي ؟؟ انا لو مكانك هقول مثلا 3 % .. طيب وبعدين يا مصطفى .. هنفترض انك مثلا حددت وقف الخسارة 30 نقطة ... طيب الاول 3% دول يعني كام من الحساب ؟؟ احسبها انت بقى وهتطلع معاك ... 30 دولار ولو طلعت غير كده ابقى قولي ... طيب عرفنا دلوقتي اننا مستعدين اننا نخسر 30 دولار ووقف الخسارة 30 نقطة .. بس برضه معرفناش ندخل بكام النقطة .؟؟ بسيطة انت دلوقتي كله اللي هتعمله انك هتقسم الـ 30 دولار على الـ 30 نقطة هيطلع الناتج 1 دولار يعني انت هتدخل النقطة بـ 1 دولار ( عقد ميني ) .. وهكذا .. طيب سامع واحد بيقول طيب والمكسب ..؟؟ ياعم الحاج المكسب زي ما يكون بقى 3 % 5% 10% مش إشكال اكيد مش هتقول للمكسب لأ بس طبعا يستحسن ميقلش عن 3 % علشان المخاطرة تكون معقولة لانك مش هتخاطر بـ 3 % علشان تكسب في الاخر 0.5 % ...!!! ياعم مصطفى انت مش بتقول لازم ميكنش فيه طمع .. ياعم وده ماله ومال الطمع ..؟؟ طيب تعالى نفترض افتراض بسيط .. لو انت مثلا عملت 6 صفقات وكل واحده فيهم كان ( امر جني الربح ) 0.5% ووقف خسارة 3 % وكلهم الحمد لله وصلوا لأمر جني الارباح .. تعالى نفترض انك دخلت صفقة سابعة بس للاسف الصفقة دي كانت خسرانة ..!! يعني انت هتخسر 3 % يعني هتخسر مكسب 6 صفقات ..صح ؟؟!! الحكاية وما فيها انك لازم تفكر كويس وتحسبها صح ..
مش عاوز اتكلم كتير في النقطة دي ... طبعا مش علشان هي مش مهمة لأ علشان هتحسها اكتر لما تشتغل بأيدك ..
دمتم بكل الود والسلام عليكم ورحمة الله وبركاته .
بعتذر لو فيه اي غلط كتابي لأني بكتب بدون مراجعة ..
أخوكم : مصطفى اليمني .