هنبدأ على بركة الله معأول حاجة معانا و هي ..
= مقدمة عامة :
ودي هنتكلم فيها عن حاجتين وهما :
• نبذة مختصرة عن سوق الفوركس .
• مصطلحات هامة .
نبذة مختصرة عن سوق الفوركس :
طبعا لما نقول سوق فوركس يبقى اكيد لازم نتعرف على حاجتين الأولى وهي كلمة سوق والتانية هي كلمة فوركس .
طيب نمسكهم واحدة واحدة الاولى ( سوق ) طبعا حضراتكم عارفين يعني ايه سوق .... طيب وايه المانع اننا نقول برضه يعني ايه سوق : السوق ده مكان بيكون فيه بائعين ومشتريين طيب ودول بيعملوا ايه في السوق ؟؟ اكيد طبعا مش بيرغوا مع بعض اكيد بيكون في بينهم تعاملات ( تجارة ) وحلقة الوصل ما بينهم بتكون السلعة وهي دي الطرف التالت في السوق .
طيب يبقى عرفنا بشكل سريع ان لو اتكلمنا وقولنا سوق يبقى لازم نقول 3 حاجات ( بائعين – مشتريين – سلع ) .
طيب دلوقتي هنمسك الكلمة التانية وهي ( فوركس ) .. طيب اكيد لو حد ميعرفش يعني ايه فوركس هيقول وده ايه ده إن شاء الله ؟؟ طيب ركز معايا وهتعرف ايه ده .
اكيد حضرتك سمعت قبل كده عن حاجة اسمها بورصة , صح ؟ اهو الفوركس ده عبارة عن بورصة ... بس خلي بالك مش بورصة أسهم وسندات .. لأ دي بورصة العملات الاجنبية ... مش مستوعب , صح ؟؟ طيب أبسطهالك احنا اتكلمنا فوق عن السوق صح ؟ اهو الفوركس ده زيه زي أي سوق .. لازم يكون فيه 3 حاجات مهمة فاكرهم ولا لأ ؟؟ ايوه صح كده سامعك بتقول ( بائعين – مشترين – سلع) .. الله ينور عليك .
طبعا ممكن واحد هنا يقول طيب بائعين وساهلة ومشترين وكمان ممكن نستوعبها ... بس المشكلة في السعلة مش مستوعب النقطة دي .
طيب ركز معايا كده وصلى على الحبيب المصطفى .. ( عليه الصلاة والسلام )
ببساطة شديدة جدا سوق الفوركس ده بيتم فيه بيع وشراء العملات يعني السلع في السوق ده هي العملات .. طيب واحد هيقول طيب انا في السوق العادي انا بشتري كيلو الطماطم بـ 5 جنيه . طيب في سوق الفوركس اللي بتقول عليها دي هشتري العملة وهدفع لصاحب الكشك بتاع العملات ايه ؟؟؟؟ اولا يا عمونا العملات مش بتتباع في كشك دي بتتباع في سوق الاتنين .. طبعا اوعى حد يصدق سوق العملات ده سوق لامركزي يعني ملهوش مكان محدد نقدر نقول عليه هو ده السوق بتاع العملات وعلى فكرة دي من أهم ما يميز سوق الفوركس .. المهم نرجع للنقطة بتاعت انا هشتري عملة طيب هدفع ايه .؟؟ أولا يا عمونا لازم نتفق على حاجة بسيطة ان سوق العملات ده بيتم تداول فيه اكتر من عملة يعني ايه ؟؟ يعني السوق ده هتلاقي فيه عملة اميريكا ( الدولار ) عملة اليابان ( الين ) عملة منطقة اليورو ( اليورو ) ... وغيرهم من العملات .. فمن البديهي لما نيجي نقول اننا هنشتري عملة اكيد هندفع مكانها عملة بلد تاني . طبعا انت هتدخل السوق علشان تشتري عملة معينة بسعر وتستنى لما سعرها يرتفع وتبيعها وتستفاد من الفرق ... زي أي تجارة .. طيب ايه رأيك انك ممكن تكسب كمان من البيع .. طيب ما انت لو حسبتها انك في الحالتين بتكون شاري وبايع في نفس الوقت يعني بتشتري عملة وبتبيع عملة في نفس الوقت وهكذا وإن شاء الله الجزئية دي هتوضح شوية لقدام ... طيب انا عندي كام سؤال كده لو سمحت يا مصطفى ....
تحت امرك يا غالي بس الاول نتكلم كده عن شوية مصطلحات في المشاركة القادمة
انتظروني ولا تنسوا LIKE 